Wafanyabiashara muwe na ndoto kubwa

Mengi: Wajasirimali muwe na ndoto kubwa

By Tanzania daima

MWENYEKITI Mtendaji wa Kampuni za IPP, Reginald Mengi, amewataka wanawake wajasiriamali nchini kuhakikisha wanatumia bidhaa za ndani wanazozizalisha wenyewe kujitangaza kimataifa.

Mengi alitoa rai hiyo jijini Dar es Salaam jana wakati akifungua mafunzo ya kuwajengea uwezo wanawake wajasiriamali waliotoka katika mikoa yote nchini yaliyoandaliwa na Mfuko wa Fursa Sawa kwa Wote (EOTF).

“Wanawake mnatakiwa kutumia fursa mnazozipata pamoja na kujitangaza kimataifa kupitia bidhaa mnazozalisha wenyewe hasa mkiheshimu mawazo yenu, kwani idadi kubwa ya watu wanakata tamaa kutokana na kudharau mawazo yao,” alisema.

Alieleza kila mwanamke anatakiwa kuwa na macho ya kuangalia fursa zinazomzunguka, kwani uwezo wa kufanya vitu vikubwa wanao kama kumiliki vitalu vya gesi, lakini kutokana na wengi wao kuwa na mawazo madogo yanachangia kuzidisha umasikini.

“Ni lazima muwe na ndoto kubwa ambayo itaweza kunizidi mimi, ukiwa na mawazo madogo utaishia hapo hapo. Usiseme unataka kuwa kama Mengi utashindwa, bali sema unataka kuwa juu zaidi yangu hapo utashinda,” alisema.

Aliwataka wajasiriamali hao waepuke kujivuna na kujiona kama wanajua kila kitu, bali wazidi kujifunza mambo mbalimbali yanayohusu ujasiriamali.